Tuug, Tuug Ma Xado

Waa baa nin, wan buuran oo shilisi ariga ugu jirey. Laba tuug baa wankii iska ilaalaystay, ninkii lahaana meel ay ka maraan iyo si ay wankii uga xadaan bay garan waayeen.
Ninkiina wuu ogaaday danta tuugtani leedahay.

Maalintii dambe, ayaa ninkii fakaray. Wuxuu is yiri : " Wallaahi wankaas inaad qasho wax ku dhaamaa inaanay jirini. Maxaa yeelay, nimankaasi ama way kaa xirrib badin oo wankay xadi, kolkaasna waad ku cood iyo cadba beeli; ama iyagoo xadaya baad ku qaban oo waad ku dhagaroobi ". Wuxuu goostay inuu isla habeenkas wanka qalo oo iska shidaysto.

Labadii nin ayaa iyaguna habeenkaas laftiisa ku tashaday inay wanka xadaan. Reerkii bay u soo duddo galeen. Waxey arkeen naagtii oo wankii haragga ka bixinaysa. Kolkaasay ciil iyo murugo daraadeed farta dhexda ka qaniineen. Mid baa yiri : "War nacasyahow, reerka sidaas kaga tegimeyno e, aynu haatan hilbaha qaadanno. Khiyaamadii aynu ku qaadi lahaynna, anigaa inoo aqaan."
Kii kale baa yiri : " Oo sidee baynnu wanka halkaas ka deldelan ee naagtu mindida ku hayso u xadi karnaa?"
Wuxuu yiri : "Dhegeyso, adigu orodoo, ilmaha yar ee halkaas ardaaga jiifa, intaad kaga oohiso, la baxso. Kolka lagaa soo daba yaaco, ayaan aniguna wanka u weydaaran doonaa. Dabadeedna waxaynu isugu iman doonaa meel heblaayo."

Sidii baa arrintu lagu gorfeeyey. Kolkii uu wiilkii dhufsaday, ayaa naagtii qaylo ka kacday:"War wiilka bahalka ka rid ! War wiilka bahalka ka rid ! War wiilka bahalka ka rid ! Alla jabay ! La teg ! "
Ninkii baa soo baxay oo tuuggii cagta cagta u saaray. Kii kalena intii xaggaan lagu sii jeeday , buu wanka hilibkiisii la baxsaday. Wax lays daba ordaaba, baa tuuggii intuu wiilkii iska dhigay, cagaha wax ka deyey oo dhuuntay. Kolkii ninkii wiilkii isa soo dul taagay, ee uu akay inaan wiilku waxba qabin, ayuu ogaaday inaan wiilka bahal sidanine, labadii tuug xirribtan sameeyeen.

Halkii buu orod dib isu sii daayey. Qori dab leh buu la rooray. Markuu joogo meeshii uu ku maleynayey in tuugtu isugu iman doonto, ayuu qunyar tallaabsaday. Qorigii dabka ahaa buu iska lalmistay oo foori ku dhuftay.

Tuuggii wanka sidey, ayaa moodey saaxiibkiis oo ka soo hor maray. Wankii oo uu ku raran yahay buu la soo aaday ninkii lahaa. Kolkuu u yimid buu wankii oo uu ku daalay degta ka soo rogey oo ninka agtiisa baldhaq kaga siiyey. Ku ye : " Ma soo dhigay dheh ! "
Ninkii wanka lahaana, intuu budh isla kala jiiday buu tuuggi labada mergi gooyey, Kaf ! Kolkaasuu ciidda cunsiiyey. Ku ye : " Ma ka dhigay dheh ! "

Halkii buu wankiisii iska xamaashay oo gurigiisii ku cunay.

EREY-BIXIN